Trosolwg ar Gadwraeth gyda Jenny Williamson BA(Anrh) ACR FIIC

Mae Cadwraeth yn gyfle i ddeall mwy am waith paentio a chael blas o’r broses o greu paentiadau.

Mae rhan gyntaf y ddarlith hon yn disgrifio sut y sefydlwyd y ffeithiau craidd am baentiad olew, a gafodd ei restru’n amheus fel “Y Frenhines Anne fel Tywysoges” gan Syr Peter Lely. Dechreuodd yr ymchwiliad drwy lanhau ac adfer y paentiad oedd hefyd yn gyfle i gymryd samplau paent i’w dadansoddi ac i wneud gwaith ymchwil celf hanesyddol i helpu i sefydlu hunaniaeth yr artist a’r eisteddwr. Drwy gael grant ar gyfer y prosiect cadwraeth hwn ac yn sgil y bartneriaeth rhwng gwyddoniaeth a chelf, llwyddwyd i adrodd stori’r gwaith mewn ffilm, arddangosfa a deunydd allgymorth.

Bydd yr ail ran yn canolbwyntio ar yr wyth paentiad gan Syr Kyffin Williams yn Oriel Gelf Glynn Vivian a gafodd eu hadfer ar gyfer arddangosfa i nodi can mlynedd ers ei eni. Mae'r paentiadau'n cwmpasu ei yrfa gyfan ac fe'u harchwiliwyd i gyd yn ystod y broses adfer. Mae astudio'r deunyddiau a ddefnyddiwyd, ei dechnegau, a'r defnydd o'r paent yn rhoi cipolwg ar ddatblygiad ei dechneg drwy gydol ei oes.