Mae gan Oriel Môn wrthrychau, gweithiau celf ac eitemau sydd â chysylltiad ag Ynys Môn neu sy'n berthnasol iddi. Fe'u cedwir mewn ymddiriedolaeth i helpu i ddiogelu ein treftadaeth a'n traddodiadau.

Caiff rhai eitemau eu harddangos yn barhaol, tra caiff eraill eu dangos mewn sioeau â thema fel rhan o'n rhaglen arddangos dros dro.

Defnydd o'r cagliadau

Defnyddir casgliadau hefyd at ddibenion ymchwil, astudio ac addysgol. Fel amgueddfa achrededig rydym hefyd yn rhoi benthyg casgliadau i sefydliadau tebyg eraill.

Gwaith ymchwil

Mae Oriel Môn yn croesawu ymchwilwyr ac yn gweithio gyda llawer o sefydliadau ac unigolion preifat. Mae'r holl gasgliadau ar gael i'w gweld wrth drefnu ymlaen llaw. Mae delweddau ar gael ar gais.

Defnydd masnachol

Gallwn gyflenwi delweddau o eitemau o’r casgliad at ddefnydd masnachol a dibenion ffilmio. Cysylltwch â ni am ragor o fanylion.

Prosiectau

Gwarchod casgliad o lyfrau brasluniau Charles F. Tunnicliffe.

Fe’i hariennir gan yr Ymddiriedolaeth Cadwraeth Llawysgrifau Genedlaethol. Golygai’r prosiect hwn warchod 52 o gyfrolau o gasgliad o lyfrau brasluniau anhygoel yr arlunydd. Comisiynwyd y rhwymwr llyfrau a'r cadwraethwr o fri, Julian Thomas, i ymgymryd â’r gwaith, a gymerodd bron i 12 mis i'w gwblhau.

Ynys Môn Fesolithig

Mae Oriel Môn yn cefnogi prosiectau archeolegol ac ymchwilwyr. Roedd hyn yn cynnwys y prosiect diweddar hwn a gynhaliwyd gan Carol White, myfyrwraig doethuriaeth ym Mhrifysgol Bangor. Y nod yw dysgu mwy am y cyfnod Mesolithig ar Ynys Môn, pan ymsefydlodd pobl yn yr ardal gyntaf wedi enciliad yr Oes Iâ ddiwethaf a phan ffurfiwyd Ynys Môn yn ynys.

Bydd Oriel Môn yn storfa ar gyfer darganfyddiadau'r gwaith ymchwil hwn unwaith y bydd y prosiect wedi'i gwblhau.

Gofalu am y casgliadau

Mae Oriel Môn yn ymdrechu'n gyson i wella’r gofal o gasgliadau. Mae gennym raglen barhaus o aildrefnu ac ailfframio lluniadau a dyfrlliwiau o'r casgliad o gelfyddyd gain i safonau amgueddfa.

Y tu ôl i’r llenni

O bryd i'w gilydd mae Oriel Môn yn caniatáu i bobl weld casgliadau nad ydynt, fel arfer, yn cael eu harddangos. Digwydd hyn fel arfer ar ffurf teithiau ‘y tu ôl i’r llenni’ a drefnwyd ymlaen llaw. Gweler ‘digwyddiadau’ i gael gwybodaeth am deithiau sydd ar y gweill.