Gallwch fynd â gwaith celf fforddiadwy adref efo chi ar y diwrnod.

Ieuan Williams

Ganwyd Ieuan Williams ym Mhenbedw (Birkenhead), a symudodd i Fôn i ddilyn gyrfa mewn dylunio graffeg a dylunio arwyddion.

Astudiodd yng Ngholeg Celf Caer a Choleg Celf Caerdydd, gan gwblhau gradd BA Anrhydedd.

Mae Ieuan wedi cynnal nifer o arddangosfeydd llwyddiannus ledled Cymru, o Ynys Môn lawr i Gaerdydd, ac mae ei baentiadau i’w gweld yn:

Yr Amgueddfa Diwydiant a Môr Cymru, Caerdydd a Llyfrgell Genedlaethol Cymru.

Julie Roberts

Rydw i wedi bod yn paentio gan ddefnyddio dyfrlliw, acrylig ac olew ers nifer o flynyddoedd. Yn ystod y cyfnod clo penderfynais arbrofi gyda gwahanol gyfryngau a dechrau defnyddio gwlân Cymreig a gwnïo manylion i mewn i fy nelweddau.
Mae tirlun Gogledd Cymru yn ysbrydoliaeth ar gyfer fy ngwaith ac mae defnyddio gwlân fel defnyddio rhan o’r tirlun i greu darlun.

Aled Lewis

Dechreuodd fy angerdd am ffotograffiaeth pan o’n i’n ifanc iawn (amser maith yn ôl!), pan gefais i gamera Kodak Electralite 10 yn anrheg pen-blwydd pan oeddwn i’n 10 oed. Yn fuan, symudais ymlaen at gamera Olympus AF-10 35mm compact, a byddwn yn edrych ymlaen yn arw at ddatblygu’r lluniau ac yn aros yn eiddgar iddynt gyrraedd drwy’r post!

Heb amheuaeth, uchafbwynt fy nhaith ffotograffiaeth oedd ennill Gwobr y Ffotograffydd Tirluniau yng Ngwobrau Ffotograffiaeth Prydain 2022, gyda’m llun o fynydd Tryfan, sydd i’w weld yma yn yr arddangosfa. Cefais gymeradwyaeth yng nghystadleuaeth Ffotograffydd Tirluniau’r Flwyddyn yn yr un flwyddyn. Mae fy lluniau hefyd wedi’u cynnwys mewn amrywiol gylchgronau gan gynnwys y Digital Photography Magazine, Country Life Magazine, Golwg, ac ar glawr blaen cylchgrawn y Sunday Times.

Fy angerdd go iawn yw tynnu lluniau o dirluniau. Rydw i’n byw mewn rhan brydferth o Ogledd Cymru ac mae hyn yn rhoi cyfle i mi dynnu lluniau’r tirluniau mwyaf anhygoel. Mae gen i ddewis enfawr o’m cwmpas – o fynyddoedd a dyffrynnoedd Eryri, sy’n llawn ysbrydoliaeth, i forliniau garw Gwynedd ac Ynys Môn.

Judith Donaghy

Fe’m ganed yn Frodsham, tref fach ddymunol iawn yn Swydd Gaer. Hyfforddais fel dylunydd tecstilau cyn mentro i fyd celfyddyd gain. Mae fy mhaentiadau olew lled-haniaethol yn cyfleu fy nghariad tuag at natur, lliw a gwead. Maent wedi’u hysbrydoli gan yr arfordir, cefn gwlad a blodau.

Rydw i’n creu’r darnau o’m cof a thrwy edrych ar frasluniau. Byddaf yn canolbwyntio ar brofiadau y gall pawb uniaethu â hwy. Ni fyddaf yn paentio yn yr awyr agored yn aml iawn. Mae’n well gen i ddychwelyd i’r stiwdio i ddehongli’r darluniau yr ydw i wedi’u creu yn fy meddwl mewn ffordd unigryw ac artistig gan ddefnyddio paled o liwiau sydd wedi’u dewis yn arbennig. Yr unig eithriad ydi fy mhaentiadau o flodau lle byddaf yn amgylchynu fy hun â blodau ac yn eu trefnu mewn gwahanol jariau a fasys.

Rydw i wedi bod yn gwneud hyn ers i mi dderbyn cymaint o flodau hyfryd gan ffrindiau a theulu pan gollais fy mab. Doeddwn i ddim eisiau eu hanghofio ac felly dechreuais eu paentio. Ar ôl postio llun o un o’r paentiadau ar y cyfryngau cymdeithasol roeddwn wedi synnu gyda’r ymateb a gefais. 6 mlynedd yn ddiweddarach rydw i’n dal i fwynhau paentio blodau tymhorol ac maent ar werth mewn orielau ledled Cymru a Lloegr.

Mae Gogledd Cymru, Ynys Môn yn benodol, bob amser yn fy ysbrydoli. Mae ei thraethau, y môr a’r awyr a’i thirwedd garw bob amser yn newid ac felly mae ganddi bob amser rywbeth gwahanol i’w gynnig. Mae’r themâu yma’n ymddangos dro ar ôl tro yn fy ngwaith. Rydw i’n gobeithio bod fy ngwaith yn dod â llawenydd i bawb ac yn gwneud iddynt deimlo’n dda.